Shrine News

ಜೂನ್ ಮಹಿನ್ಯಾಚ್ಯಾ 18 ತಾರಿಕೆರ್ ಆಯ್ತಾರಾ ದಿಸಾ ಸಕಾಳಿಂ 7.30 ವರಾರ್ ಸಭಾರ್ ವಾಡ್ಯಾಗಾರಾಂ ಸಾಂಗಾತಾ ಮೆಳೊನ್ ಮಾ. ಬಾ. ಆಲ್ಬನ್ ಡಿ’ಸೋಜಾ ಆನಿ ಮಾ. ಬಾ. ಲ್ಯಾರಿ ಪಿಂಟೊ ಸಾಂಗಾತಾ ನಿತ್ಯಾಧಾರ್ ಮಾಯೆಕ್ ಅರ್ಗಾಂ ಬಲಿದಾನ್ ಭೆಟೆಯ್ಲೆಂ. ವಾಡ್ಯಾಗಾರಾನಿಂ ಅಪಾಪ್ಲ್ಯಾ ಘರಾನಿಂ ಉಪಲಬ್ದ್ ಆಸಲ್ಲ್ಯೊ ಕಾಣಿಕೊ ಹಾಡ್ನ್ ಮಿಸಾರ್ ಭೆಟಯ್ಲ್ಯೊ.

ತ್ಯಾಚ್ ದಿಸಾ ಸಾಂಜೆರ್ 4.00 ವೊರಾರ್ ಫೆಸ್ತಾಚೆ ಆಚರಣ್ ಶ್ರೀಮತಿ ಲೂವಿಜಾ ಕ್ಯಾಸ್ತೆಲಿನೊ ಹಿಚ್ಯಾ ಘರಾ ಆಯೋಜನ್ ಕೆಲ್ಲೆಂ.

ನಿತ್ಯಾಧಾರ್ ಮಾಯೆಚ್ಯಾ ಮಾನಾಕ್ ಸರ್ವಾನಿಂ ಗೀತಾ ಗಾವ್ನ್ ಮಾಗ್ಣ್ಯಾ ವಿಧಿ ಮಾ. ಬಾ. ಲ್ಯಾರಿ ಪಿಂಟೊನ್ ಆರಂಭ್ ಕೆಲಿ. ಹರ್ಯೆಕಾ ಕುಟ್ಮಾಚೆರ್ ಮರಿಯೆಚಿ ಭೆಸಾವಾಂ ಆನಿ ತಿಚಿ ಭಲಾಯ್ಕೆಚಿ ಮಜತ್ ಮಾಗ್ಲಿ. ಜಮೊ ಜಾಲ್ಲ್ಯಾ ಹರ್ಯೆಕ್ಲ್ಯಾನಿಂ ನಿತ್ಯಾಧಾರ್ ಮಾಯೆಕ್ ಫುಲಾಂ ಅರ್ಪುನ್ ಗೀತ್ ಗಾಯ್ಲೆಂ. ಆಮ್ಚ್ಯಾ ವಾಡ್ಯಾಚೆ ಗರ್ಜೊ ಮಾಯೆ ಮುಖಾರ್ ದವರ್ನ್ ಶ್ರೀಮಾನ್ ಅನಿಲ್ ನೊರೊನ್ನಾನ್ ಪ್ರತ್ಯೆಕ್ ಮಾಗ್ಣೆಂ ಕೆಲೆಂ.

ಜಮ್ಲ್ಲ್ಯಾ ಸರ್ವಾಂಕ್ ಆಪ್ಲ್ಯಾ ನೃತ್ಯಾ ಮುಖಾಂತ್ರ್ ವಾಡ್ಯಾಚ್ಯಾ ಚಲಿಯಾನಿಂ ಸ್ವಾಗತ್ ಕೆಲೊ. ವಾಡ್ಯಾಚ್ಯಾ ಗುರ್ಕಾರಾನ್ ಮಾನಾಚ್ಯಾ ಉತ್ರಾನಿಂ ಸರ್ವಾಂಕ್ ಸ್ವಾಗತ್ ಕೆಲೊ.

ಮುಕೆಲ್ ಸೈರೆ ಜಾವ್ನ್ ಫಿರ್ಗಜ್ ವಿಗಾರ್ ಮಾ. ಬಾ. ಆಲ್ಬನ್ ಡಿಸೋಜಾ, ಆತ್ಮಿಕ್ ನಿರ್ದೇಶಕ್ ಮಾ. ಬಾ. ರೋಮನ್ ಮಸ್ಕರೇನಸ್, ಸಹಾಯಕ್ ವಿಗಾರ್ ಮಾ. ಬಾ. ಲ್ಯಾರಿ ಪಿಂಟೊ, ಫಿರ್ಗಜ್ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಸಂತೋಷ್ ಡಿಸಿಲ್ವಾ, ಕಾರ್ಯದರ್ಶಿ ರೊನಾಲ್ಡ್ ನೊರೊನ್ಹಾ, 20 ಆಯೋಗಚಿ ಸಂಯೋಜಕಿ ಬೆನೆದಿಕ್ತಾ ನೊರೊನ್ಹಾ, ಸಿ. ಕಾರ್ಮಿಣ್, ಸಿ. ಶಾಂತಿ, ಸಿ. ಮೊಂತಿ, ಬೈದಾಳ್ ಬಿ ವಾಡ್ಯಾಚೊ ಪ್ರತಿನಿಧಿ ಜಾವ್ನ್ ಆಸ್ಚ್ಯಾ ಪಾವ್ಲ್ ಫೆರ್ನಾಂಡಿಸ್, ಗುರ್ಕಾರ್ ಲೊರೆನ್ಸ್ ಡಿಸೋಜಾ ಹಾಣಿಂ ವೆದಿರ್ ಬಸ್ಕಾ ಘೆತಲ್ಲಿ.

ಆಯಿಲ್ಲ್ಯಾ ಸರ್ವ್ ಸೈರ್ಯಾಂಕ್ ವಾಡ್ಯಾಗಾರಾನಿಂ ಗುಲೊಬ್ ದೀವ್ನ್ ಸ್ವಾಗತ್ ಕೆಲೊ. ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಸಂತೋಷ್ ಡಿಸಿಲ್ವಾನ್ ಆಪ್ಲಿ ಭೊಗ್ಣಾಂ ಉಚಾರ್ಲಿ ಆನಿ ವಾಡ್ಯಾಗಾರಾಂಕ್ ಬರೆಂ ಮಾಗ್ಲೆಂ. ವಾಡ್ಯಾಚಿ ಭೋವ್ ಮಟ್ವಿ ವರ್ದಿ ಕ್ರಿಸ್ತಿನ್ ಲೋಬೊನ್ ವಾಚುನ್ ಸಾಂಗ್ಲಿ.

ವಾಡ್ಯಾಚಿ ಆದ್ಲಿ ಗುರ್ಕಾರ್ನ್ ಜಾವ್ನಾಸಾಲ್ಲ್ಯಾ ಬೆನ್ನಿ ಟೀಚರಿನ್ ಬೈದಾಳ್ ವಾಡ್ಯಾ ವಿಶ್ಯಾಂತ್ ಹೊಗ್ಳಿಕಾ ಉಪ್ಕಾರ್ಲಿಂ ಆನಿ ಬರೆಂ ಮಾಗ್ಲೆಂ. ವಾಡ್ಯಾಂತ್ಲಿ ಉರ್ಬೆವಂತ್ ಆನಿ ಶಿಕ್ಪಾಂತ್ ಅತ್ತ್ಯುತ್ತಮ್ ಅಂಕ್ ಜೊಡುಲ್ಲ್ಯಾ ಶೈನಾ ಕ್ಯಾಸ್ತೆಲಿನೊ ಆನಿ ಆರ್ವಿನ್ ನೊರೊನ್ಹಾಕ್ ಬಾ. ರೋಮನ್ ಮಸ್ಕರೇನಸಾನ್ ಮಾನ್ ಕೆಲೊ.

ಆರನ್ ಡಿಸೋಜಾ ಆನಿ ತಾಚ್ಯಾ ಸಾಂಗತ್ಯಾನಿಂ ಜಮ್ಲ್ಲ್ಯಾ ಸರ್ವಾಂಕ್ ಸ್ಪರ್ದಾತ್ಮಕ್ ಖೆಳ್ ಚಲಯ್ಲೆ. ಮಾ. ಬಾ. ಆಲ್ಬನ್ ಡಿಸೋಜಾನ್ ವಾಡ್ಯಾಗಾರಾಂಕ್ ಫೆಸ್ತಾಚೆಂ ಶುಭಾಶಯ್ ಪಾಟಯ್ತಾನಾ ಹರ್ಯೆಕ್ಲಾಂಚೆ ಮೆತೆರ್ ಪಣ್ ಚಡ್ ಗರ್ಜೆಚೊ ಮ್ಹಣ್ ಸಂದೇಶ್ ದಿಲೊ.

ಸಾಂಸ್ಕೃತಿಕ್ ಕಾರ್ಯಕ್ರಮಾರ್ ವಾಡ್ಯಾಂತ್ಲ್ಯಾ ಸ್ತ್ರೀಯಾನಿಂ ಎಕ್ಕಾ ಸಕಾ ಮ್ಹಳ್ಳೊ ತುಳು ನಾಸ್ ಪ್ರದರ್ಶಿತ್ ಕೆಲೊ.

ಖೆಳಾಂತ್ ಜಿಕಲ್ಲ್ಯಾಂಕ್ ಬೆನ್ನಿ ಟೀಚರಿನ್ ಬಹುಮಾನ್ ವಿತರಣ್ ಕೆಲೆ. ಜೆಸಿಂತಾ ಅಂದ್ರಾದೆ ಹಿಣೆ ಜಮಲ್ಲ್ಯಾ ಸಮೆಸ್ತಾಂಕ್ ಧನ್ಯವಾಧ್ ದಿಲೆ. ಫಳಾಹಾರ್ ಸಂಗಿ ಆಮ್ಚ್ಯಾ ವಾಡ್ಯಾಚೆ ಫೆಸ್ತ್ ಅಖೇರ್ ಕೆಲೆಂ.